60 mijë fëmijë të larguar në 10 vitet e fundit, Meta thirrje Kuvendit të ri: Ndalojeni këtë fenomen të rrezikshëm

Presidenti Ilir Meta përmes një postimi në Facebook shkruan se sipas të dhënave të EUROSTAT nga Shqipëria janë larguar 60 mijë fëmijë 10 vitet e fundit.

Meta shkruan se ky fenomen shqetësues duhet të ndalohet nga Kuvendi i ri dhe ka kërkuar ngritjem e një Komisioni Hetimor Parlamentar, për të hetuar gjendjen dhe vendodhjen e tyre, analizuar arsyet dhe përgjegjësit, si dhe rekomanduar masat efikase me qëllim ndërtimin e një strategjie konkrete shtetërore.

Postimi i Metës:

Sipas të dhënave të bëra publike nga EUROSTAT, mbi 60.000 fëmijë janë larguar nga Shqipëria dhe kanë kërkuar azil për herë të parë në një vend të BE-së gjatë 10 viteve të fundit (2011-2020).

Mbi 82 përqind e tyre janë nën moshën 14 vjeç.

Thellësisht i shqetësuar për këtë largim masiv të fëmijëve nga Shqipëria, veçanërisht për faktin se destinacioni i tyre final është i paqartë, e mbështes kërkesën e CRCA/ECPAT dhe inkurajoj ngritjen e një Komisioni Hetimor Parlamentar, me hapjen e Kuvendit të ri, për të hetuar gjendjen dhe vendodhjen e tyre, analizuar arsyet dhe përgjegjësit, si dhe rekomanduar masat efikase me qëllim ndërtimin e një strategjie konkrete shtetërore për ndalimin e këtij fenomeni të rrezikshëm.

Huazuar nga Albeu.com

Një kafe nga ju!